Pontius Meropius Paulinus episcopus Nolanus, Inscription for Cynegius

Exegit uitam florente Cynegius aeuo

Et laetus sancta placidae requiescit in aula.

Illum nunc Felicis habet domus alma beati,

Dudum per longos susceptum possidet annos,

5

Ipseque iam placito laetatur in hospite Felix.

Sic et tutus erit iuuenis sub iudice Christo,

Cum tuba terribilis sonitu concusserit orbem

Humanaeque animae rursum in sua uasa redibunt:

Felici merito hic sociabitur ante tribunal.

10

Interea in gremio Abraham cum pace quiescit.